Растот на трошоците за живот и понатаму го притиска семејниот буџет, а најновите пресметки на Сојузот на синдикати на Македонија покажуваат дека основните животни потреби сè потешко се покриваат со постојните примања. Синдикалната минимална кошница за декември повторно бележи пораст, што уште еднаш ја отвора дебатата за реалната куповна моќ на граѓаните и за потребата од усогласување на економските политики со секојдневната финансиска реалност на домаќинствата.
Вредноста на синдикалната минимална кошница што ја пресметува Сојузот на синдикати на Македонија (ССМ) за декември годинава изнесува 65.492 денари и е за 319 денари зголемена во однос на минималната кошница за минатиот месец кога изнесуваше 65.173.
ССМ информираше дека со изнајмен стан од 60 метри квадратни за декември синдикалната минимална кошница изнесува 80. 867 денари.
Според пресметките на ССМ, во декември за храна и пијалаци се потребни 23.640 денари, за Образование 7.159 денари, за Станарина, вода, електрична енергија, и греење 6.130 денари, Облека и обувки 5.875 денари, Транспорт 4.636 денари, Ресторани и хотели 4.131 денар, Комуникации 3.417, Лична хигиена и оддржување на хигиена во домот 2.620 денари.
Заменик министерот за економија и труд, Марјан Ристески на 17-ти месецов најави дека од 1 јануари освен што синдикатите ќе ја пресметуваат минималната потрошувачка кошничка и тие како Влада ќе прават пресметка за просечна потрошувачка кошничка, која ќе биде за најмалку четиричлено семејство. На оваа тема ќе се разговара на Економско –социјалниот совет, кој е закажан на 22 декември (понеделнк).