Преговорите меѓу ЕУ и Велика Британија за нивните идни односи продолжуваат да напредуваат во трите најтешки области, а преговорите ќе продолжат, се вели во заедничката изјава на претседателката на Европската комисија и британскиот премиер.
“Се согласивме дека условите за склучување на договорот не беа исполнети поради разликите во трите преостанати критични прашања”, се вели во заедничкото соопштение издадено од Урсула фон дер Лајен и Борис Џонсон по нивниот телефонски разговор.
Трите критични области околу кои со месеци нема напредок се риболовот, односно пристапот на европските рибари до британските води, фер пазарните услови и начинот на решавање на идните спорови.
“Ги замоливме нашите главни преговарачи и нивните тимови да подготват преглед на преостанатите разлики, за кои ќе се разговара на физички состанок во наредните денови во Брисел“, се вели во соопштението.
Пред телефонскиот разговор помеѓу Фон дер Лајен и Џонсон, претседателката на Комисијата оствари виртуелна средба со германската канцеларка Ангела Меркел, францускиот претседател Емануел Макрон и претседателот на Европскиот совет, Шарл Мишел.
На состанокот се разговарало за Брегзит и темите на агендата на самитот на лидерите на земјите-членки, што ќе се состанат во Брисел во четврток и петок.
