Европските берзи тргуваа претпазливо во четврток наутро, бидејќи технолошкиот сектор повторно беше под притисок, а се очекува извештајот за работни места во САД, кој обично има значително влијание врз насоката на пазарот.
Индексот STOXX 600 на водечките европски акции порасна за 0,1 процент во 9:30 часот наутро.
Во исто време, лондонскиот индекс FTSE зајакна за 0,10 проценти, на 10.490 поени, додека франкфуртскиот DAX се зголеми за 0,22 проценти, на 25.095 поени, а парискиот CAC за 0,50 проценти, на 8.378 поени.
Цените на акциите во технолошкиот сектор паднаа најмногу утрово, како и на Волстрит и азиските берзи, во просек за 1,5 проценти. Сепак, индексот STOXX не е премногу изложен на тој сектор, па затоа падот на технолошките акции не влијаеше значително на тој индекс.
Во фокусот на инвеститорите денес ќе биде извештајот за вработеноста во САД, кој обично има значително влијание врз пазарот бидејќи ја покажува состојбата на пазарот на трудот и што може да се очекува во однос на каматните стапки.