Компанијата Микросам АД, од денеска (четврти) до шести ноември, во Прилеп ќе биде домаќин на вториот семинар на тема Автоматизација во композитното производство, кој заедно со Институтот за современи композити и роботика (СКР) за прв пат го организираа во 2012 година.
На семинарот учесниците и предавачите ќе бидат претставници од Русија, Италија, Германија, Унгарија од водечки компании во авионската и автомобилската индустрија.
Овој меѓународен семинар е единствен од ваков тип во државава и пошироко, кој покрај врвни предавачи кои теоретски ги покриваат светските трендови во композитната индустрија и роботиката, ќе понуди практичен дел кој вклучува демонстрација на најсовремените технологии за процесирање на композитни материјали и производство на композитни делови – автоматско намотување на композити на резервоари под висок притисок (тип 4 – најсовремените резервоари во светот) и комплексни делови кои како крајни производи се најдуваат меѓу вселенските структури, автоматско сечење на препрег и автоматско полагање на влакна и лента.
Последните две технологии се оние со кои Микросам ја издвојува Македонија меѓу единствените четири земји во светот кои ја имаат развиено оваа технологија.
