На светските берзи цените на акциите пораснаа и минатата недела, вторпат по ред, но тргувањето беше неизвесно бидејќи американската централна банка наскоро би можела да ги зголеми каматните стапки поради зголемената инфлација.
На Волстрит минатата недела индексот Dow Jones зајакна за 0,7 отсто, на 51.564 поени, додека S&P 500 порасна за 0,9 отсто, на 7.500 поени, а Nasdaq 2,4 отсто, на 26.517 поени.
На самиот почеток на неделата индексите пораснаа, благодарение на договорот меѓу САД и Иран, со кој ќе се продолжи прекинот на огнот за уште 60 дена за да се добие време за конечен договор за завршување на војната.
Според договорот, САД почнаа да ја укинуваат поморската блокада на иранските пристаништа, а Иран почна да го отвора Ормускиот теснец, клучна рута за извоз на нафта од Блискиот Исток.
Благодарение на ова, цената на нафтата падна на најниско ниво во последните три месеци, што донекаде ги ублажи стравувањата на инвеститорите од пораст на инфлацијата и зголемување на каматните стапки.
ФЕД навести зголемување на каматните стапки
Но, во средата берзанските индекси ги загубија сите добивки од почетокот на неделата бидејќи инвеститорите беа загрижени од пораките од американската централна банка.
Hа редовната седница челниците на ФЕД ги оставија каматните стапки непроменети во опсег од 3,50 до 3,75 отсто, очекувано, но во новите проекции девет од вкупно 18 очекуваат барем едно зголемување на каматите до крајот на оваа година.
Покрај тоа, веќе нема никакви индикации во најавата на ФЕД дека каматните стапки би можеле да се намалат.
Поради војната на Блискиот Исток, цените на нафтата силно пораснаа во последните месеци, што го поттикна растот на цените на енергијата, па инфлацијата во САД достигна највисоки нивоа во последните три години.
На првата прес-конференција откако стана претседател на Банката на федерални резерви, Кевин Варш ја нагласи потребата за ограничување на инфлацијата.
Тоа не треба да изненадува, но инвеститорите се надеваа на различни пораки, со оглед на тоа што многумина гледаат на Варш како поборник на стимулативна, а не на рестриктивна монетарна политика.
„Во најавата за изјавите на ФЕД и Варш, очигледно е дека инфлацијата загрижува, па затоа е нагласено постигнувањето на ценовната стабилност“, посочува Мајкл Џејмс, директор во Rosenblatt Securities.
По пораките на ФЕД, се засилија пазарните шпекулации дека до крајот на годината централната банка ќе ги зголеми каматните стапки за најмалку 0,25 процентни поени.
Растот на технолошкиот сектор го поддржува пазарот
Сепак, еден ден подоцна индексите ги надоместија тие загуби, најмногу благодарение на закрепнувањето на цените на акциите на технолошките компании, особено на производителите на чипови, па неделата ја завршија со добивка.
И на повеќето европски берзи цените на акциите пораснаа минатата недела. Франкфуртскиот DAX индекс зајакна за 1,4 отсто, на 24.985 поени, а париски CAC зајакна за 0,85 отсто, на 8.421 поен. Лондонски FTSE се лизна, од друга страна, за 1 отсто, на 10.363 поени.
