Компанијата Александар МН планира наскоро во центарот на Белград да ја отвори првата автоматска аптека во Србија, пишува еКапија.
Овој вид на автоматски аптеки е апсолутен хит во светот во давање на дополнителни услуги од областа на малопродажбата и фармацијата, којашто на купувачите во голема мера им го штеди времето, им го поедноставува купувањето.
Автоматската аптека ќе биде отворена 24 часа, а ќе им биде од голема корист и на странците кои ќе се најдат во Белград и кои веќе се навикнати на ваков начин на купување на фармацевтски производи.
Од компанијата Александар МН велат дека во автоматската аптека ќе може да се купат производи и медицински средства за коишто не е потребен лекарски рецепт: средства против настинка, болки, додатоци за исхрана, храна за бебиња и слично.
Во план е ширење на ваков вид на автоматски аптеки во затворени и отворени простории и објекти низ Србија, здравствени установи, шопинг центри, супермаркети, аеродроми, хотели…