Renault Bridger е нов SUV инспириран од Suzuki Jimny. Ќе се продава во Индија, Африка и Блискиот Исток со бензински и хибридни мотори
Францускиот производител Renault најави нов компактен теренец со робустен карактер, кој директно ќе конкурира на легендарниот Suzuki Jimny. Моделот е претставен во форма на концепт под името Renault Bridger Concept, а според најавите, сериската верзија ќе биде наменета исклучиво за пазари надвор од Европа.
Иако многумина на Стариот континент би сакале ваков мал, но способен SUV, Renault го развива Bridger пред сè за пазарите во Индија, Африка и Блискиот Исток, каде компактните теренци со бензински и хибридни мотори сè уште имаат голема побарувачка.
Компактни димензии, но робустен карактер
Според првите информации, новиот Bridger ќе има должина помала од четири метри, што го прави вистински компактен SUV. За споредба, електричниот Renault 4 е долг околу 4,14 метри, додека Dacia Duster достигнува околу 4,34 метри.
И покрај малите димензии, Renault ветува изненадувачки просторна кабина. Дизајнот е јасно инспириран од класичните теренци – каросеријата има квадратни линии, висока силуета и резервно тркало поставено на задната врата, детали кои веднаш асоцираат на Jimny, но и на иконски модели како Land Rover Defender.
Развиен во Индија за глобалните пазари
Концептот Bridger е најава за сериски модел кој ќе има важна улога во глобалната експанзија на Renault. Според информациите, автомобилот ќе биде дизајниран и развиен во Индија, најверојатно во фабриката на Renault во Ченаи.
Токму затоа, производството и продажбата ќе бидат фокусирани на пазари како Индија, Африка и Блискиот Исток, каде компактните SUV модели со робусен изглед и практичност се особено популарни.
Бензински и хибридни мотори наместо електричен погон
Иако техничките детали сè уште не се официјално потврдени, се очекува новиот модел да користи погонски единици слични на оние кај индиската верзија на Renault Duster.
Основната верзија најверојатно ќе користи 1,0-литарски турбо трицилиндричен бензински мотор со околу 99 КС, комбиниран со шестстепен мануелен менувач. Над него ќе се позиционира 1,3-литарски турбо четирицилиндричен мотор со 158 КС и шестстепен автоматски менувач со двојна спојка.
На врвот од понудата би можела да се најде и хибридна верзија со 1,8-литарски мотор и два електромотори, со комбинирана моќност од околу 158 КС.
Премиера наскоро
Целосната слика за Renault Bridger Concept ќе биде откриена следната недела, кога Renault ќе го претстави моделот во рамки на својата нова стратегија за глобален раст.
До тогаш, тизер фотографиите веќе создаваат голем интерес, бидејќи Bridger изгледа како редок пример на модерен, мал и вистински робустен SUV – токму онаков каков што многумина би сакале да го видат и на европските патишта.
Преземено од Автоплус.мк