Британската економија претрпе пад од шест отсто после Брегзит, покажува анализата на економистите заснована на внатрешните податоци на Банката на Англија за одлуките, ставовите и финансиските перформанси на илјадници британски компании од референдумот одржан пред една деценија.
Проучувајќи ги податоците што Банката ги користи при донесување одлуки за каматните стапки, истражувањето го анализираше изгубениот економски раст обидувајќи се да реконструира како економијата на Обединетото Кралство би се развивала доколку не гласала за напуштање на Европската унија.
Утврдено е дека околу половина од економската загуба се должи на шокот и неизвесноста од самиот постреферендумски период, додека остатокот е резултат на зголемените трговски бариери откако Велика Британија ја напушти царинската унија и единствениот пазар во 2021 година.
Сепак, некои критичари тврдат дека студијата не ги зема предвид подобрите перформанси на американските инвестициски и технолошки сектори, како и европскиот енергетски шок што се случи пред четири години.
Коавтор на студијата, Ник Блум, изјави дека економијата на Обединетото Кралство силно пораснала во годините пред Брегзит и дека, дури и со одредени отстапувања, можела барем делумно да го следи растот на САД доколку немало нарушувања предизвикани од напуштањето на ЕУ. Тој нагласи дека податоците за деловните операции на компаниите собрани од Банката на Англија даваат важна дополнителна потврда за тие заклучоци.
„Во случајот со Брегзит, имаше значително економско влијание врз Велика Британија, но тоа се развиваше постепено во текот на следната деценија“, истакнуваат авторите на извештајот.
Ова доаѓа во време кога врвните претставници на Банката на Англија стануваат сè поотворени во објаснувањето на економските последици од Брегзит во последните месеци.
„Мислам дека нивото на економска активност и економски раст беше пониско. А причината за тоа е фактот дека ако ја намалите големината на пазарите со кои тргувате, односно ги намалите вашите извозни пазари, тоа обично има негативно влијание врз економскиот раст“, рече гувернерот на Банката на Англија, Ендру Бејли.
Некои економисти, пишува Би-Би-Си, веруваат дека е тешко да се моделира колку би пораснала економијата доколку немаше Брегзит и дека ваквите студии го преценуваат неговото влијание, особено во период обележан со бројни глобални кризи.
Во истражувањето, податоците на ниво на поединечни компании беа комбинирани со пет по традиционални методи на економска анализа. Додека податоците за работењето на компанијата укажуваат на економска загуба од шест проценти во текот на десет години, пошироките анализи проценуваат просечен учинок од околу осум проценти.
Иако имаше различни обиди да се изолираат ефектите од зголемената неизвесност и трговските бариери со Европската Унија врз економскиот раст на Велика Британија, ова е прв пат клучните податоци од Банката на Англија за британскиот корпоративен сектор да се користат на овој начин.
Со други зборови, новината на оваа студија не е само во проценката на влијанието на Брегзит, туку и во методологијата: авторите користеле детални податоци за однесувањето и деловните резултати на илјадници британски компании собрани од Банката на Англија за целите на водење на монетарна политика, наместо да се потпираат исклучиво на агрегатните макроекономски индикатори.
Притоа, тие се обиделе да добијат попрецизна слика за тоа како неизвесноста по референдумот и последователните трговски бариери влијаеле врз економијата.