Фото: Pixabay
Понекогаш е навистина тешко да бидеме сигурни дека сме ја одбрале вистинската професија или сме ја донеле помалку ризичната одлука. Сите работи во животот имаат свои добри и лоши страни и затоа не е сосем неочекувано ако направиме грешка.
Она што е важно е во клучните моменти од животот, оние што оставаат големи последици, да ја донесеме правилната одлука.
Донесувањето на одлуки е процес при којшто сме соочени со неколку можности од кои треба паметно да одбереме една, по што логично следуваат низа акции за да можеме истата да ја спроведеме на дело.
Начинот на којшто ги донесуваме одлуките во голема мера зависи од нашиот карактер.
Целите, амбициите, интересите и желбите влијаат на нашата одлука, но влијае и моментот кога ја донесуваме и приоритетите што сме ги одбрале за себе.
Одлуките што вклучуваат планирање, земање во предвид долгорочни цели (со тоа и краткорочни) се најквалитетни, затоа што со нив ги вклучуваме и своите животни цели и остваруваме со мали чекори. Тоа значи дека превземаме контрола над својот живот.
Погрешни начини на донесување одлуки
Кога донесувате одлука, внимавајте како и кога тоа го правите и одбегнете ги следниве погрешни начини:
Импулсивно – донесување одлуки во моментот, кога аналитичкото размислување е скоро исклучено.
Фаталистички – неодлучување, препуштање на околностите на кои ќе наидеме.
Имитирачки – кога при процесот на одлучување се потпираме на туѓи избори без разлика дали ни одговараат или не.
Одложување – одбегнување на донесување на одлуката сè до последниот момент кога најчесто сме принудени на некој избор.
Големите и важни одлуки не е лесно да се донесат, но во секој случај треба да останеме доследни на себе си, на своите вредности, тежнеења и желби. Само на тој начин можеме да ги намалиме евентуалните негативни последици од изборот.
