Европската енергетска криза се прелева низ целиот свет, сите се надеваат на топла зима

88

Денес државите се потпираат повеќе од кога било на природниот гас како гориво за греење на домовите и енергетската индустрија, во услови на напори да се напушти јагленот и да се зголеми употребата на почисти извори на енергија. Но, нема доволно гас за да се поттикне закрепнување по пандемијата и да се надополнат потрошените резерви пред следните студени месеци.

Земјите на Европската унија особено се обидуваат да се надминат едни со други во снабдувањето, бидејќи извозниците, како и Русија, се обидуваат да задржат повеќе природен гас.

Кризата во Европа претпоставува проблеми и за остатокот од планетата, бидејќи поради недостаток на енергија на Стариот континент, владите предупредуваат на прекин на електричната енергија и затворање на производствените погони, пишува Блумберг.

Залихите во европските складишта се на историски ниски нивоа за овој период од годината. Тековите на гасоводите од Русија и Норвешка беа ограничени. Ова е загрижувачки затоа што малку посмирените временски услови го намалија производството на ветерна енергија, додека старите европски нуклеарни централи постепено се исклучуваат или стануваат склони кон прекини – што го прави гасот уште попотребен. Не е ни чудо што европските цени на гасот се зголемија за речиси 500 проценти минатата година и се тргуваат близу до рекордните вредности.

Овој скок принуди некои производители на земјоделско ѓубриво во Европа да го намалат производството, а се очекува да следат уште многу, со што ќе се зголемат трошоците за земјоделците и потенцијално ќе се зголеми глобалната инфлација на цените на храната. Во Велика Британија, високите цени на енергијата исфрлија од работа неколку добавувачи.

Дури и обично студената зима на северната хемисфера се очекува дополнително да ги зголеми цените на природниот гас во поголем дел од светот. Во Кина, индустриските корисници, вклучително и производителите на керамика, стакло и цемент, може да одговорат со зголемување на цените; домаќинствата во Бразил ќе се соочат со скапи сметки за електрична енергија. Економиите кои не можат да си дозволат гориво – како што се Пакистан или Бангладеш – би можеле да бидат целосно затворени.

Комуналните претпријатија и креаторите на политики се молат за благи температури, бидејќи веќе е предоцна да се зголемат резервите. Изгледите за забрзување на трошоците за енергија, заедно со проблемите во синџирите на снабдување и цените на храната на највисоко ниво во последните децении, може да ги натера централните банки да се запрашаат дали скокот на инфлацијата е привремен како што се надеваа. Трговците внимателно ќе ја следат секоја временска прогноза објавена од сега до декември.

Во Азија, увозниците на течен природен гас плаќаат рекордни цени за овој период од годината за да обезбедат снабдување, а некои почнуваат да се враќаат на „валкани“ горива како јаглен и нафта за греење во случај да не добијат доволно. Ова може да ги поткопа владините напори за постигнување на амбициозни зелени цели, со оглед на фактот дека гасот емитира околу половина јаглерод диоксид од јагленот.