Google, како една од најголемите компании во светот, сериозно навлегува во истражување на своите вработени, односно што ги мотивира, што им ја намалува ефикасноста и клучно во сето тоа, како влијаат менаџерите на целата атмосфера во компанијата.
Преку проектот Oxygen, група на истражувачи од компанијата направи листа од 10 главни и клучни карактеристики кои треба да ги има еден менаџер за да може да се каже дека тој е добар.
- Добриот менаџер е добар тренер – наместо да го реши проблемот, добриот менаџер ја користи приликата да го пренесе своето знаење и да му помогне на вработениот заедно да го решат.
- Не ги микроменаџира тимовите – туку им ја дава на членовите слободата да истражуваат, да преземаат ризици, да прават грешки.
- Им обезбедува психолошка доверба на вработените – прави вработените да се чувствуваат сигурни дека нема да бидат исмејувани, понижувани или помалку вреднувани, ако погрешат или постават прашање.
- Добриот менаџер е продуктивен и ориентиран кон остварување резултати – Поставуваат добар пример за својот тим работејќи и не се плашат да ги засукаат ракавите и да ги мотивираат своите вработени.
- Добриот менаџер е добар слушател – активното слушање на своите вработени помага во развивање емпатија, меѓусебно запознавање и градење доверба.
- Добриот менаџер го поттикнува напредокот – не само на работата, туку и на градење на понатамошната кариера на своите вработени. Ги споделуваат своите проценки и помагаат во професионалниот развој на вработениот.
- Има јасна стратегија и цел за својот тим – преку добра комуникација со тимот, добриот менаџер знае каде се наоѓа неговиот тим во моментот, каде треба да биде и како да стигне до таму.
- Добриот менаџер ја познава работата – тој не е тука само да шефува, туку и самиот ги познава секојдневните обврски на своите вработени. Така го познава нивниот капацитет и секојдневните предизвици.
- Остваруваат соработка – лошите менаџери ги саботираат другите тимови, додека добрите работат за општото добро на компанијата.
- Донесува јасни одлуки – добриот менаџер не е импулсивен, туку аналитичен и промислен во донесувањето одлуки. По разгледување на фактите и перспективите, ги придвижуваат работите, дури и ако некому тоа не му одговара. И остануваат доследни на своите одлуки.
Фото: Freepik
