Стапката на инфлација во Хрватска, мерена преку потрошувачките цени, се лизна на 3,3 отсто во мај, од 3,7 отсто еден месец претходно, потврди втората проценка на Државниот завод за статистика (ДЗС), објавена во понеделникот.
Цените на стоките и услугите за лична потрошувачка, мерени преку индексот на потрошувачките цени, во мај, во однос на истиот месец лани, се зголемени во просек за 3,3 отсто, додека во однос на април се зголемени во просек за 0,1 отсто. Така, со втората проценка се потврдија податоците од првата, која ДЗС ја објави на крајот на мај.
По неколку месеци постепен пад, во март годинава инфлацијата стагнираше на 4,1 отсто на годишна основа. Сепак, од април, кога падна на 3,7 отсто, инфлацијата повторно е на надолна траекторија.
Во мај се лизна на најниското ниво од септември 2021 година, кога исто така беше 3,3 отсто.
Цените на алкохолните пијалоци и тутунот, како и во образованието се зголемени за 5,4 отсто, а во здравството за 5,3 отсто.
Цените на рекреацијата и културата се зголемени за 3,8 отсто, комуникацијата за 3,2 отсто, храната и безалкохолните пијалоци за 2,8 отсто, а мебелот, домашната опрема и редовното одржување на домаќинствата за 2,4 отсто. Од друга страна, цените на транспортот се намалени за 0,7 отсто на месечно ниво, а домувањето, водата, струјата, гасот и другите горива за 0,4 отсто.
