Железничкиот товарен транспорт во Европската унија донекаде закрепна во 2021 година, по падот на перформансите од 2,2 отсто и 6,1 отсто во 2019 и 2020 година, соодветно, во споредба со претходните години, покажуваат најновите податоци на Канцеларијата за статистика на ЕУ (Евростат).
„Со цел да се спречи ширењето на пандемијата на корона вирусот, земјите-членки воведоа рестриктивни мерки кои имаа значително влијание врз железничкиот товарен сообраќај, иако патничкиот сообраќај на шините беше повеќе погоден. Имаше знаци на одредено закрепнување во 2021 година, при што товарниот транспорт порасна за 8,7 отсто во споредба со 2020 година, речиси достигнувајќи го нивото од 2018 година од 399 милијарди тониски километри (ткм)“, се објаснува во извештајот на Евростат.
Првите знаци на закрепнување се забележани во четвртиот квартал од 2020 година, кога е забележан пораст од 5,1 отсто во однос на истиот квартал од претходната година. Овој тренд постепено продолжи во сите квартали од 2021 година.
Највисока стапка на раст на железничкиот товарен сообраќај има во вториот квартал од 2021 година – 20,5 отсто, а потоа во третиот квартал – осум отсто. Првиот и четвртиот квартал пораснале за 3,4 отсто во споредба со истиот квартал од 2020 година.
Со 123 милијарди тониски километри, Германија придонесе најмногу за перформансите на железничкиот товарен транспорт во ЕУ во 2021 година, што претставува околу 31 отсто од вкупниот резултат на Унијата. Следат Полска со 54 милијарди tkm и Франција со 36 милијарди tkm. На другиот крај на скалата, Грција, Луксембург и Ирска регистрираа помалку од една милијарда тони километри минатата година.
Во седум земји-членки на ЕУ, железничкиот товарен транспорт е намален во 2021 година: Данска (-18,9 отсто), Португалија (-18,3 отсто), Литванија (-8,2 отсто), Латвија (-7,7 отсто), Ирска (-5,2 отсто), Хрватска ( -3,3 отсто) и Унгарија (-2,1 отсто).
Во останатите земји-членки, перформансите на железничкиот сообраќај се зголемени во истиот период. Најголем раст има Естонија (+22,9 отсто), потоа Шпанија (+20,3 отсто), Словачка (+18,6 отсто), Италија (+15 отсто), Германија (+13,5 отсто), Франција (+13,3 отсто) и Романија (+ 10,9 проценти).
Германија беше земја-членка со најголем раст, со 14,7 милијарди tkm во 2021 година во споредба со 2020 година. Следуваше Франција со раст од 4,2 милијарди tkm во истиот период.
