Франција ја национализира својата најголема енергетска компанија

46

Француската влада најави национализација на најголемата електроенергетска компанија во земјата во обид да постигне енергетски суверенитет во време кога Европа се соочува со енергетска криза влошена со руската инвазија на Украина, пишуваат светските медиуми.

Француската премиерка Елизабет Бурн рече дека државата целосно ќе ја национализира Електрик де Франс (ЕДФ), што ќе и даде на владата поголема контрола врз реструктуирањето на компанијата која е зафатена со долгови, истакнува Ројтерс.

ЕДФ, во која државата веќе поседува 84 отсто, е една од најголемите европски компании за електрична енергија и е во срцето на француската нуклеарна стратегија, која владата сака да ги ублажи ефектите од порастот на цените на енергијата, кои дополнително се зголемија со можноста за ненадеен прекин на испораките на руски гас.

Француските енергетски компании бараат заштеда на енергија

Таа компанија, сепак, како што истакнува Ројтерс, наместо да биде адут на владата, стана нејзина најголема главоболка поради повеќегодишните одложувања на изградбата на новите нуклеарни централи во Франција и Велика Британија, со пречекорувања на буџетот од повеќе милијарди евра.

– Денеска ви потврдувам дека државата има намера да контролира 100 отсто од капиталот на ЕДФ – рече Борн во говорот во долниот дом на францускиот парламент кога ги презентираше приоритетите на нејзината малцинска влада.

По сегашните пазарни цени, откупот на акции кои Владата сè уште не ги поседува би чинел околу пет милијарди евра.

ЕДФ оваа година се соочи со голем број проблеми, според Ројтерс. Половина од нејзините застарени реактори во Франција моментално се исклучени, принудувајќи ја постојано да го намалува производството на нуклеарна енергија во време кога Европа се бори да најде алтернативи за рускиот гас.

Компанијата беше погодена и од владините одлуки кои ја принудија да продава електрична енергија на конкурентите по пониски цени, како дел од напорите да ги заштити француските потрошувачи од наглото зголемување на трошоците за живот.

Во 2005 година ЕДФ излезе на берзата во Париз по цена од 33 евра по акција. Нејзините акции вредеа нешто помалку од девет евра на крајот на тргувањето во средата, иако нивната вредност скокна за 14,5 отсто по најавата за национализација.

Фото: Facebook