Кои компании работат на изградба на метаверзумот?

27

Минатата недела Facebook го промени своето име во Meta Platforms за да сугерира дека се фокусира на метаверзумот, за кој верува дека ќе биде наследник на мобилниот интернет.

Метаверзумот е поврзан со идејата за заедничка виртуелна платформа, до која корисниците ќе имаат пристап преку различни уреди и каде ќе можат да се движат во дигиталната средина.

Дури и пред извршниот директор на Facebook, Марк Цукерберг, да претстави демо снимки со огромни роботи и дигитално патување низ времето до антички Рим, десетици компании веќе подготвуваа софтвер и хардвер за оваа дигитална иднина, објави Ројтерс.

Цела деценија може да не одвои од целосната реализација на концептот, а ќе бара соработка меѓу технолошките гиганти. Во јуни, инвестициската фирма Roundhill Investments формираше берзанско тргуван фонд (ETF) за да ги следи и профитира од градителите на метаверзум. Неколку часа пред Facebook да го објави своето ребрендирање, друга компанија лансираше свој ETF, поврзан со метаверзумот.

Еве некои од компаниите кои играат улога во градењето на овој нов дигитален свет:

Roblox

Платформата за видео игри Roblox Corporation, која излезе во јавност оваа година, го гледа метаверзумот како место каде што „луѓето можат да искусат милиони 3D искуства за учење, играње, создавање и дружење“.

Roblox се обидува да им даде на корисниците и програмерите различни начини за создавање дигитални светови. Извршниот директор на компанијата зборуваше за иднината на купувањето и деловните процеси преку платформата, која има своја виртуелна економија, изградена на сопствената валута Robux.

Microsoft

Презентирајќи еден од финансиските извештаи на Microsoft оваа година, извршниот директор Сатја Надела рече дека компанијата работи на изградба на „корпоративен метаверзум“ во кој дигиталниот и физичкиот свет се спојуваат преку нејзините понуди.

Microsoft, кој е сопственик на Xbox и играта за градење светови Minecraft, е исто така клучен играч во светот на игрите. Лидерот на Xbox, Фил Спенсер, зборуваше за плановите на компанијата за „метаверзум или градење мешана реалност“.

Facebook

Facebook, кој ќе започне со тргување на берзата како Meta Platforms од 1 декември, рече дека сака да се гледа како компанија за метаверзум, а не како компанија за социјални медиуми.

Технолошкиот гигант, кој има околу 3 милијарди корисници, инвестира многу во зголемена и виртуелна реалност со градење на својата виртуелна средина Horizon, достапна преку очилата Quest.

Nvidia

Производителот на компјутерски чипови Nvidia ја изгради својата платформа Omniverse за поврзување на 3D светови во заеднички виртуелен универзум. Таа тврди дека Omniverse, кој се користел за проекти како што е создавање на симулатори за вистински згради и фабрики, е основата на која може да се изгради метаверзумот.

Unity

Unity Software, која развива софтвер за дизајн на видео игри, е уште една компанија која може да продава алатки или технологии дизајнирани за изградба на метаверзум.

Snap

Сопственикот на Snapchat – Snap, долго време создава сопствени аватари и филтри за зголемена реалност за да ги наметне дигиталните слики на оние од реалноста. Оваа година ги претстави своите први очила за проширена реалност, кои се достапни за експериментирање од страна на програмерите кои создаваат искуства за корисниците на уредот.

Autodesk

Компанијата за облачен софтвер, Autodesk создава програми што ги користат архитекти и инженери за дизајнирање и изградба на згради и производи. Неговиот софтвер се користи и за создавање виртуелни светови за игри и забава.

Tencent

Кинескиот технолошки гигант Tencent Holding е најголемата светска компанија за видео игри според приходите. Таа има удели во големи студија како што се Epic Games и Activision Blizzard.

Оваа година, South China Morning Post објави дека Tencent регистрирал голем број заштитни знаци поврзани со метаверзумот за својата социјална мрежа QQ.

Epic Games

Epic Games е компанија која стои зад феноменот Fortnite, која се пресели надвор од главната игра, на општествени искуства, како што се танцови забави и концерти за виртуелна музика. Корисниците плаќаат за да ги облечат своите аватари во различни костими и можат да градат свои острови и игри. Epic ја поседува и платформата Unreal, која се користи за развој на игри и други визуелни ефекти.

Извршниот директор на Epic Games, Тим Свини е отворен критичар на големите платформи како Apple и Google. Тој тврди дека метаверзумот ќе мора да биде простор за заедничко учество.

Аmazon

Гигантот за онлајн трговија Amazon.com, кој е и најголемиот светски провајдер на облачни услуги и има голем број медиумски понуди, исто така се смета за потенцијален играч во метаверзумот.