Кинескиот премиер Ли Кианг во своето обраќање на Светскиот економски форум во Давос во вторникот рече дека довербата меѓу земјите овозможила огромен напредок во глобализацијата во изминатите децении.
Зборувајќи за темата на овогодинешниот Форум „Обнова на довербата“, Ли рече дека тоа ќе влијае на многу луѓе.
„Основата на довербата е нагризана, што ги зголемува ризиците за глобалниот раст и мирниот развој“, рече Ли, додавајќи дека е неопходно повторно да се изгради довербата за да се надминат тешкотиите и да се создаде подобра иднина.
„Од суштинско значење е да ги отфрлиме предрасудите и да работиме заедно за да го решиме дефицитот на довербата. Светот влезе во нов период на турбуленции и трансформации, но целокупната динамика на светскиот напредок нема да се промени“, рече кинескиот премиер.
Тој го претстави кинескиот план за градење доверба од пет точки. Според него, пред сè, потребно е да се зајакне координацијата на макроекономската политика, за да се создаде подобра синергија, а со тоа и побрз раст. Ли предупреди дека поради меѓусебната поврзаност на економијата, се случуваат прелевања, така што ако се користат „делумни одговори“ на кризи, тоа ќе ја ослаби светската економија.
Второ, рече Ли, меѓународната индустриска специјализација и соработка треба да се зајакнат за да се направат синџирите на снабдување „стабилни и мазни“. Тој наведе дека од 2020 до 2023 година се воведени 5.400 нови дискриминаторски трговски мерки, што е двојно повеќе од пред пандемијата.
Третиот е подобрување на соработката во иновациите. Ли рече дека земјите треба да работат заедно за да создадат отворена, фер и недискриминаторска средина за науката и технологијата, за да овозможат иновациите да напредуваат во отворена средина.
Кинескиот премиер како четврта точка истакна дека е потребна соработка за зелен развој за подобро справување со климатските промени. Тој ја критикуваше практиката да се поставуваат бариери за зелената трговија, за да не може слободно да циркулира некоја зелена технологија. Ли рече дека земјите мора да работат заедно за целосна транзиција кон зелена економија.
Како последна петта точка, кинескиот премиер изјави дека е неопходно да се зајакне соработката Север-Југ и Југ-Југ за да се изгради поинклузивна светска економија. Тој предупреди дека прашањата како што е технолошкиот јаз станаа уште поакутни во последниве години.
Ли изјави дека кинеската економија бележи постојан напредок и ќе продолжи да дава силен придонес во светската економија. Тој ја спореди кинеската економија со гледање во Алпите, бидејќи треба да се погледне од далечина за да се добие вистинскиот увид. Според него, придонесот на Кина во светскиот економски раст останал на околу 30 отсто, додека кинеската економија минатата година закрепнала и почнала да расте.
Кинескиот премиер на сцената беше пречекан и пред публиката беше претставен од основачот на Светскиот економски форум во Давос, Клаус Шваб, кој изјави дека Ли е лидер кој се залага за бизнис и реформи.
