Бавниот економски раст ќе ја истисне Франција од првите десет економии во светот во рок од пет години, покажуваат глобалните прогнози на Меѓународниот монетарен фонд (ММФ).
Институцијата со седиште во Вашингтон очекува уделот на Франција во глобалниот БДП во однос на паритетот на куповната моќ да падне на 1,98 отсто во 2029 година, во споредба со 2,2 отсто забележани од аналитичарите на ММФ минатата година.
Последните проекции на фондот покажуваат дека францускиот буџетски дефицит ќе остане над четири отсто до 2029 година, а јавниот долг се очекува да надмине 115 отсто од бруто домашниот производ (БДП).
Европската комисија претходно навести потенцијални конфликти со фискалните правила на ЕУ во својот одговор на францускиот буџетски план за 2024 година, нагласувајќи дека сегашната перспектива претставува ризик од негативно прилагодување од страна на светските рејтинг агенции, пренесува „Блиц“.
Според базата на податоци, која организацијата ја ажурираше во април, Обединетото Кралство ќе учествува со 2,2 отсто од глобалниот БДП на ЈПП во 2029 година – рангирајќи ја како десетта по големина економија во светот. Се предвидува дека Турција ќе го заземе деветтото место, бидејќи се проценува дека нејзиниот удел ќе достигне 2,09 отсто во следните пет години.
Првите пет економии кои придонесуваат за глобалната економија ќе бидат Кина, која се предвидува да учествува со 19,48 отсто од светскиот БДП до 2029 година, САД (14,72 отсто), Индија (9,23 отсто), Јапонија (3, 21 отсто) и Индонезија (2,79 проценти). Меѓу првите десет се очекува да бидат Германија (2,77 отсто), Русија (2,71 отсто) и Бразил (2,19 отсто).
Во април, ММФ ја зголеми својата прогноза за глобален раст за тековната година, заклучувајќи дека светската економија се покажала „изненадувачки отпорна“.
Економистите очекуваат растот на глобалниот БДП да достигне 3,2 отсто во 2024 година, што е за скромни 0,1 процентен поен повисоко од прогнозата на почетокот на јануари. Следната година се очекува раст од 3,2 отсто.
