Азиско-пацифичкиот регион ќе загуби повеќе од кој било друг регион доколку глобалниот трговски систем биде растргнат од геополитичките тензии, предупреди Меѓународниот монетарен фонд (ММФ).
Земјите од Азија и Пацификот би можеле да изгубат повеќе од 3,0 отсто од бруто домашниот производ (БДП) ако трговијата биде нарушена во секторите погодени од неодамнешните американски санкции против Кина за употреба на чипови направени насекаде во светот со американски алатки и ако нетарифните бариери во другите области ќе бидат подигнати на „нивото од ерата на Студената војна“, според истражувањето на ММФ што го објави агенцијата Танјуг.
Тоа е двојно повеќе од проектираниот износ на глобални годишни загуби. Секторите во азиските земји би можеле да претрпат просечна загуба на вработеност од дури 7,0 отсто поради намалената трговија, додава Фондот.
„Кога станува збор за дополнително зголемување на трговската несигурност и рестриктивни мерки, тоа на крајот ќе ескалира во фрагментација на пазарот и поделба на светот“, рече Кришна Сринивасан, директор на Одделот за Азија и Пацифик на ММФ. Тој изјави дека „Азија ризикува да изгуби многу бидејќи е клучен играч во глобалните синџири на снабдување, а во фрагментиран свет ризикува да изгуби повеќе од кој било друг“.
Знаците на глобална фрагментација се појавија за време на трговската војна меѓу САД и Кина во 2018 година. Сепак, новите сигнали за фрагментација, како што е војната Русија-Украина, предизвикуваат уште поголема загриженост. Санкциите против Русија дополнително ги зголемија неизвесностите поврзани со трговските текови, објави ММФ.
Неизвесноста за трговската политика, а не само рестриктивните мерки сами по себе, би можеле да ја запрат економската активност бидејќи компаниите го паузираат вработувањето и инвестициите, а новите фирми го одложуваат влегувањето на пазарите, се вели во извештајот.
На пример, ММФ утврди дека трговските тензии меѓу САД и Кина во 2018 година имаа ефект, по две години, на пад на инвестициите за околу 3,5 проценти.
ММФ забележува дека неговото истражување се фокусирало на влијанието на фрагментацијата врз трговијата, но дека овој процес може да има други подлабоки последици, како што е „распадот на финансиските врски“.
„Финансиската фрагментација може да доведе до краткорочни трошоци од брза девалвација на финансиските позиции и долгорочни трошоци од намалена диверзификација и побавен раст на продуктивноста поради падот на странските директни инвестиции“, објаснува ММФ.
Оваа меѓународна финансиска организација ги повикува земјите да ги отстранат штетните трговски ограничувања и да ја намалат неизвесноста со отстранување на бариерите во нивните политики.
